Dəyərli K.Fərəcova adına Elmi-Tədqiqat Pediatriya İnstitutu saytının izləyiciləri

İnstitutun direktoru olaraq Sizi salamlamaqdan qürur hissi keçirirəm. 1925-ci ildən fəaliyyət göstərən Elmi-Tədqiqat Pediatriya İnstitutu uzun və şərəfli ömür yolu keçmişdir. Bir əsr tarixə yaxın zaman ərzində İnstitutumuzun həkimləri tərəfindən xeyli sayda uşaqlarımız müalicə olunaraq şəfa tapmış, tibb elmi sahəsində bir çox yeniliklərə imza atılmışdır.

1993-cü ildə Ümummilli Liderimiz Heydər Əliyev Azərbaycanda hakimiyyətə gəldikdən sonra səhiyyəmiz misilsiz inkişafa qədəm qoymuşdur. Məhz Ümummilli Liderimizin rəhbərliyi dövründə ölkəmizdə bir çox tibb müəssisələri inşa edilmiş, səhiyyəmizin elm potensialı inkişaf etmişdir. Son 17 il ərzində ölkəmizdə 750-dən çox xəstəxana yenidən tikilmiş (əsaslı şəkildə təmir edilmiş), xeyli sayda soydaşımız xarici ölkələrdə təhsil və təcrübə keçməyə göndərilmişdir. Xüsusilə də tam əminliklə qeyd etmək istərdim ki, Azərbaycan Respublikası Prezidentinin müvafiq Fərmanı ilə yaradılmış İcbari Tibbi Sığorta üzrə Dövlət Agentliyi Səhiyyəmizi yeni inkişaf mərhələsinə aparacaq, dünya standartlarına uyğun, şəffaf və ədalətli səhiyyə xidmətlərinə keçidi təmin edəcəkdir.

Əziz valideynlərimizi əmin etmək istərdim ki, K.Fərəcova adına Elmi-Tədqiqat Pediatriya İnstitutunun kollektivi övladlarımızın sağlam və rahat gələcəyi üçün bütün güc və bacarıqlarını əsirgəməyəcəklər.